తెలంగాణ గ్రూప్ 1 మెయిన్స్‌కు లైన్ క్లియర్
తెలంగాణలో గ్రూప్-1 పరీక్షల నిర్వ‌హ‌ణ‌కు లైన్ క్లియర్ అయింది. గ్రూప్1 నోటిఫికేష‌న్ల‌ను స‌వాల్ చేస్తూ ప‌లువురు దాఖ‌లు చేసిన పిటిషన్లను తెలంగాణ హైకోర్టు కొట్టివేసింది. దీంతో ఈ నెల 21 నుంచి గ్రూప్-1 మెయిన్స్ ప‌రీక్ష‌లు య‌థావిధిగా జ‌ర‌గ‌నున్నాయి. వీటితోపాటు ప్రిలిమ్స్‌పై దాఖలైన పిటిషన్లను కూడా హైకోర్టు కొట్టేసింది. ప్రిలిమ్స్‌లోని ఏడు ప్ర‌శ్న‌ల‌కు ఫైన‌ల్ ‘కీ’లో స‌రైన స‌మాధానాలు ఇవ్వ‌లేద‌ని పిటిషన‌ర్లు హైకోర్టును ఆశ్ర‌యించిన విష‌యం తెలిసిందే. వాటికి మార్కులు క‌లిపి మ‌ళ్లీ మెయిన్స్‌కు ఎంపిక అభ్య‌ర్థుల జాబితాను విడుద‌ల చేయాల‌ని కోరారు. వీటిపై విచార‌ణ చేప‌ట్టిన న్యాయ‌స్థానం పిటిషన్లను కొట్టివేస్తూ తీర్పునిచ్చింది. ప్రిలిమ్స్ పై దాఖలైన పిటిషన్లను హైకోర్టు కొట్టివేయడంతో గ్రూప్ 1 మెయిన్స్ పరీక్షలకు లైన్ క్లియర్ అయినట్లైంది. ఇప్పటికే గ్రూప్ 1 మెయిన్స్ హాల్‌ టికెట్లు కూడా విడుదలయ్యాయి. పరీక్షల కోసం టీజీపీఎస్సీ వడివడిగా ఏర్పాట్లు చేస్తుంది.
